Draumastarfið

14.06.2018

TheBTeam-logo

Með sól í sinni og gleði í hjarta langar mig að segja ykkur að þann 1. ágúst nk. tek ég við draumastarfinu, sem forstjóri B Team The B Team var stofnað fyrir fimm árum af þeim Richard Branson (stofnanda Virgin Group) og Jochen Zeitz (fv. forstjóra Puma). Aðrir stjórnarmenn eru m.a. Arianna Huffington (stofnandi Huffington Post), Mary Robinson (fv. forseti Írlands), Professor Muhammad Yunus (nóbelsverðlaunahafi og stofnandi Grameen Bank), Christiana Figueres (fv. Loftslagsstjóri Sameinuðu þjóðanna), Marc Benioff (stofnandi og forstjóri Salesforce), Dr. Gro Harlem Brundtland (fyrsti kvenforsætisráðherra Noregs), Sharan Burrow (aðalritari alþjóðlega stéttafélagasambandsins) og Paul Polman (forstjóri Unilever) sem er að taka við sem stjórnarformaður B Team á sama tíma og ég hef störf.

Þeir, ásamt öðrum hugrökkum leiðtogum sem ég ber mikla virðingu fyrir, hafa einsett sér að leiða þá umbreytingu sem þarf að verða á viðskipta- og stjórnarháttum á heimsvísu. Þeir eru að endurskilgreina hlutverk fyrirtækja, sem vissulega þurfa að skila hagnaði til að vera sjálfbær, en verða einnig að beita afli sínu í þágu umhverfis og samfélags. Efst á dagskrá eru loftslagsmálin, en B Team leggur líka áherslu á að auka fjölbreytni í forystu, á gagnsæi og uppbyggingu trausts og á sköpun manneskjulegra vinnustaða og samfélags.

Það er mikill heiður að vera treyst fyrir forystuhlutverki fyrir svo mikilvæg verkefni og ég hlakka virkilega til að starfa með þessum leiðtogum og frábærum hópi starfsmanna að málum sem ég brenn einlæglega fyrir. Í hnotskurn snýst þetta allt saman um þá tegund forystu sem við verðum að sjá, jafnt í einkageiranum sem og annarsstaðar. Ég hlakka virkilega til að ljá hug minn, hjarta og hendur í þágu slíkrar forystu og trúi því að þarna geti ég gert gagn og látið gott af mér leiða.

Við fjölskyldan munum flytja til Bandaríkjanna í sumar, en höfuðstöðvar B Team eru í New York. B Team er einnig með skrifstofur í London og leiðtoga, starfsmenn og samstarfsaðila er að finna um allan heim.

Kæru vinir, ég á mér þann draum að Ísland setji sér það markmið að vera í forystu um að skapa hér sjálfbært og manneskjulegt samfélag og verði þannig öðrum þjóðum fyrirmynd (mögulega fyrsta B þjóðin?). Það gerist ekki að sjálfu sér og krefst hugrakkrar forystu á öllum sviðum okkar samfélags sem og víðtæks samtals og samstarfs. Ég hvet ykkur, hvar sem þið starfið, til að velta því fyrir ykkur hvernig þið getið lagst á árar um að svo verði.